Mayın 15-də Bakı Ekspo Mərkəzində regionun ən böyük kənd təsərrüfatı sərgisi olan 17-ci Azərbaycan Beynəlxalq Kənd Təsərrüfatı “Caspian Agro” sərgisi öz işinə başlayıb.
“Caspian Agro” ilə paralel olaraq Bakı Ekspo Mərkəzində 29-cu Azərbaycan Beynəlxalq Qida Sənayesi “InterFood Azerbaijan” sərgisinin açılışı olub. Sərgilərinin təşkilatçıları “Caspian Event Organisers” şirkəti, eləcə də onların tərəfdaşları olan “Caspian Event Management” və “ICA Events” şirkətləridir. Sərgilər Azərbaycan Respublikası Kənd Təsərrüfatı Nazirliyi və Azərbaycan Sərgi Təşkilatçıları Assosiasiyası (ASTA) tərəfindən aktiv şəkildə dəstəklənir.
Sərgilərin təntənəli açılış mərasimində Azərbaycanın Respublikası Kənd təsərrüfatı naziri Məcnun Məmmədov, Belarus Respublikası Baş nazirinin müavini İqor Petrişenko, Qida Təhlükəsizliyi Agentliyinin sədri Qoşqar Təhməzli, Azərbaycan Respublikasının Kiçik və Orta Sahibkarlığın İnkişafı Agentliyinin (KOBİA) İdarə Heyətinin sədri Orxan Məmmədov, Özbəkistan Respublikası Kənd təsərrüfatı nazirinin müavini Əlişir Şükürov, İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev, BMT-nin Ərzaq və Kənd Təsərrüfatı Təşkilatının (FAO) Azərbaycandakı nümayəndəsi Məhəmməd Nasar Hayyat, "ICA Group" un Baş İcraçı direktoru Edvard Stroon, "Caspian Event Organisers" şirkətinin Baş Direktoru Fərid Məmmədov iştirak ediblər.
Azərbaycanın kənd təsərrüfatı naziri Məcnun Məmmədov sərgilərin açılışında çıxış edərkən bildirib ki, Dövlət aqrar sektorun inkişafına böyük diqqət yetirir. Bu baxımdan prioritetlər təkcə texnika və yeni texnologiyalar deyil, həm də ekoloji komponent, iqlim dəyişikliyi məsələləri, ekologiyanın aqrar sahəyə təsiri problemləridir. Nazir vurğulayıb ki, Caspian Agro sərgisi iştirakçıların əksəriyyətinin marağına səbəb olan bu məsələlərin geniş müzakirəsinə imkan verəcək. Nazirin sözlərinə görə, sərgiyə gələn fermerlərə geniş çeşiddə məhsul və xidmətlər – müasir texnika, suvarma sistemləri, texnoloji həllər, fermerlərə göstərilən xidmətin effektiv forması təqdim olunub.
Belarus Respublikası Baş nazirinin müavini İqor Petrişenko Azərbaycanın dinamik inkişafı ilə bağlı müsbət təəssüratını ifadə edib və dövlətin kənd təsərrüfatının inkişafına göstərdiyi böyük diqqəti vurğulayıb.
Belarus hər il Caspian Agro və InterFood sərgilərində fəal iştirak edir. Bu il, cənab Petrishchenko qeyd etdi ki, ölkəmizdən qırxdan çox şirkət ət, süd, qənnadı məmulatları, balıq, alkoqol məhsulları, həmçinin gübrələr, bitki emalı üçün kimyəvi maddələr, baytarlıq məhsulları, kənd təsərrüfatı texnikalarını gətirmişdir. Yekunda natiq söyləyib ki, 2024-cü il sərgiləri yeni biznes ideyalarının doğulduğu yer olacaq, qarşılıqlı faydalı əməkdaşlıq üçün növbəti imkanlar açacaq.
Qida Təhlükəsizliyi Agentliyinin sədri Qoşqar Təhməzli açılan sərginin miqyasını vurğuladı ki, bu da dövlətin iqtisadiyyatın aqrar və ərzaq sektorlarının inkişafına göstərdiyi diqqətin göstəricisidir. Kənd təsərrüfatı məhsullarının və qida məhsullarının təhlükəsizliyi, bitki və heyvanların sağlamlığı iqtisadiyyatın bu sahələrinin inkişafında mühüm amillərdən biridir. Azərbaycan öz nailiyyətlərini əyani şəkildə nümayiş etdirir və bu sahədə mühüm nailiyyətlər barədə hesabat verir.
Azərbaycan Respublikasının Kiçik və Orta Sahibkarlığın İnkişafı Agentliyinin (KOBİA) İdarə Heyətinin sədri Orxan Məmmədov sərgilərin həm ziyarətçilər, həm də sahibkarlar üçün faydalı olacağına əminliyini bildirib. KOBİA, ondan çox sahibkarın müxtəlif məhsullar təqdim etdiyi böyük stendi ilə çıxış edir. Əlbəttə ki, sərgi marketinqi bu mal və xidmətlərin təbliğinə kömək edir.
Özbəkistan Respublikası Kənd təsərrüfatı nazirinin müavini Əlişir Şükürov bu qlobal tədbirin təşkilatçılarını və iştirakçılarını Özbəkistan dövləti adından salamlayıb. Cənab Şükürov qeyd edib ki, bu tədbir aqrar sektor və qida sənayesi ilə bağlı keçirilən bir sıra tədbir və sərgilər arasında ən vaciblərindən biridir. Caspian Agro və InterFood Azərbaycan üçün təkcə mühüm hadisə deyil, həm də müasir texnologiyaların yerli, regional və qlobal səviyyədə təbliği üçün katalizator, əməkdaşlığın qurulması üçün vahid platformadır. Özbəkistanın biznes nümayəndələri uzun illərdir ki, bu sərgidə fəal iştirak edir, ölkələrimiz arasında əməkdaşlığı möhkəmləndirirlər.
Sərgilərdə əhatə olunan sənaye sahələrinə dövlət tərəfindən xüsusi diqqət yetirilir. Azərbaycan Respublikasının Prezidenti İlham Əliyev uzun illərdir ki, Caspian Agro və InterFood Azerbaijan sərgilərini ziyarət edir.
Bu il ilk dəfə olaraq Bakı Ekspo Mərkəzində yeni - ardıcıl dördüncü sərgi zalı açılıb. Beləliklə, hər iki irimiqyaslı sərgi Bakı Ekspo Mərkəzinin bütün dörd zalı və açıq məkanını əhatə edir. Sərgilər 38 ölkədən 500-ə yaxın şirkəti birləşdirir. Ötən illə müqayisədə 10 faiz artım var.
Bu il Caspian Agro növbəti dəfə aqrar-sənaye kompleksinin aparıcı iştirakçılarını, yerli və xarici ekspertləri, kənd təsərrüfatı məhsullarının idxalçılarını, ixracatçılarını, distribyutorlarını, topdan və pərakəndə ticarət nümayəndələrini, eləcə də minlərlə peşəkar ziyarətçi auditoriyasını, o cümlədən fermerləri, bir araya gətirdi.
Xarici iştirakçılar arasında Belarus, Belçika, Almaniya, Gürcüstan, İsrail, İtaliya, Çin, Latviya, Hollandiya, Rusiya Federasiyası, Serbiya, ABŞ, Türkiyə, Finlandiya, Fransa, Çexiya, Estoniya və Cənubi Koreya şirkətləri var. Türkmənistan və Venesuela nümayəndələri ilk dəfədir ki, iştirak edirlər.
Üç gün davam edəcək “Caspian Agro”nun əsas bölmələrinə kənd təsərrüfatı texnikası, kənd təsərrüfatı obyektləri və avadanlıqları, suvarma sistemi, qablaşdırma, kənd təsərrüfatında innovasiya texnologiyaları, heyvandarlıq və quşçuluq, istixana, yemlər, baytarlıq, bitkiçilik, gübrə, meyvə və tərəvəzlərin yetişdirilməsi daxildir.
Ənənəvi olaraq, sərgilər çərçivəsində ikitərəfli işgüzar görüşlər (B2B və B2G) keçiriləcəkdir. Burada yerli və xarici şirkətlərin nümayəndələri üzbəüz formatda əməkdaşlıq və gələcək tərəfdaşlıq yollarını müzakirə edə biləcəklər. Bundan əlavə, ikitərəfli işgüzar görüşlər çərçivəsində özəl şirkətlərin nümayəndələri dövlət qurumlarının təmsilçiləri ilə görüş imkanı əldə edəcəklər.
Bu il sərgidə ilk dəfə olaraq Aqrar İnnovasiya Mərkəzinin təşkilatçılığı ilə “Yaşıl dünya naminə həmrəylik ili” çərçivəsində “GreenAgroHack” hakaton yarışması keçiriləcəkdir. Sözügedən müsabiqədə proqram tərtibatçıları, interfeys dizaynerləri və kompüter proqramçılarından təşkil olunan komandalar bir araya gələrək
kənd təsərrüfatı sahəsinə aid texnoloji həllər tapacaq və yeni layihələr ərsəyə gətirəcəklər. Qalib komandalar pul mükafatı və digər qiymətli hədiyyələrlə mükafatlandırılacaqlar.
Təşkilatçılar hər il ən son sənaye yenilikləri və beynəlxalq təcrübə ilə tanış olan fermerlər üçün sərgiyə ekskursiyalar təşkil edirlər. Bu il Caspian Agro-ya Azərbaycanın qırx iki rayonundan beş yüzdən çox fermer səfər edəcək.
Sərginin proqramına ənənəvi “Qızıl Şah” Milli Kulinariya Çempionatı daxildir. Bu çempionat çərçivəsində ilk dəfə olaraq “Beynəlxalq Kubok” keçiriləcək. Çempionatda ümumilikdə 8 beynəlxalq komanda, 24 yerli komanda və 100-dən çox fərdi iştirakçı mübarizə aparacaq.
Bu il sərgilərdə ətraf mühitə zərərli təsirlərin ixtisar olunması istiqamətində səmərəli yolların axtarışı baxımından kənd təsərrüfatının dayanıqlı intensivləşdirilməsi və iqlim dəyişikliyi (Sustainable Agriculture and Climate Change) konsepsiyası özəlliklə vurğulanacaqdır. Bu konsepsiya aqrar sahədə məhsul istehsalının artırılması və eyni vaxtda ekologiyanın qorunması arasında tarazlığın yaradılmasına yönəldilib. Kənd təsərrüfatının dayanıqlı intensivləşdirilməsi və iqlim dəyişikliyi konsepsiyası sərginin loqosunda da öz əksini tapmışdır.
“Caspian Agro” sərgisinin sponsorları “traktor.az” “Rostselmash” və “STP” şirkətləridir.

İstinad : Caspian Agro I Azərbaycan Beynəlxalq Kənd Təsərrüfatı Sərgisi