Azərbaycan Dövlət Aqrar Universiteti (ADAU) Publik Hüquqi Şəxsin nəznində fəaliyyətə başlayan Gəncə Dövlət Aqrar Kollecinə direktor təyin olunub.

Qeyd olunan vəzifəyə ali təhsil müəssisəsinin əməkdaşı Fəqan Ağayev təyin edilib.

Fəqan Ağayev 1998-ci ildə Azərbaycan Kənd Təsərrüfatı Akademiyasının (indiki ADAU) “Aqronomluq” ixtisasının bakalavr pilləsini, 2000-ci ildə “Aqronomluq” ixtisası üzrə magistr pilləsini uğurla başa vurub.

2000-2013-cü illərdə Norveç, ABŞ, Almaniya, Türkiyə təşkilatları tərəfindən icra edilmiş müxtəlif beynəlxalq layihələrdə kənd təsərrüfatı üzrə layihə rəhbəri, proqram rəhbəri və yerli aqrar mütəxəssis kimi fəaliyyət göstərmişdir.

2013-2014-cü illərdə Azərbaycan Elmi Tədqiqat Pambıqçılıq İnstitutunda elmi işçi kimi çalışmış, 2015-ci ildən bu günədək ADAU-nun Bağçılıq kafedrasında müəllim kimi fəaliyyət göstərib. Bakalavr pilləsində "Örtülü sahə tərəvəzçiliyi", “Aqrar məsləhət xidməti”, "Tərəvəzçilik" və "Bitkiçilik məhsulları istehsalı" fənlərindən mühazirə, seminar və laboratoriya dərslərini ingilis dilində tədris edir.

2014-cü ildə "Gəncə-Qazax bölgəsi şəraitində kartofun başlıca xəstəliklərinə qarşı inteqrir mübarizə üsullarının işlənib hazırlanması" mövzusunda namizədlik dissertasiyasını müdafiə etmişdir, aqrar elmlər üzrə fəlsəfə doktorudur.

Ağayev Fəqan Fizuli oğlu, ADAU-da fəaliyyəti müddətində 30 elmi məqalənin, 14 fənn proqramının, 1 metodik göstərişin, 2 dərs vəsaitinin müəllifidir. Fəaliyyəti müddətində müxtəlif beynəlxalq təlimlər, konfranslar və seminarlarda iştirak etmişdir.

Fəqan müəllimə fəaliyyətində uğurlar arzu edirik!
İstinad : AZƏRBAYCAN DÖVLƏT AQRAR UNİVERSİTETİ