Azərbaycan Dövlət Aqrar Universitetinin (ADAU) Aqronomluq fakültəsində Ulu Öndər Heydər Əliyevin anım günü münasibətilə onun zəngin həyat və fəaliyyətinə həsr olunan tədbir keçirilib.

Əvvəlcə tədbir iştirakçıları Ulu Öndər Heydər Əliyevin tədris binasında yerləşən büstünü ziyarət edib, önünə tər gül dəstələri qoyublar.

Dövlət Himninin səsləndirilməsi ilə başlanan tədbirdə Ümummilli Lider Heydər Əliyevin və torpaqlarımızın ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edilib.

Çıxış edən fakültə dekanı Məhərrəm İsmayılov Ulu Öndər Heydər Əliyevin Azərbaycanın inkişafı və milli dövlətçiliyin gücləndirilməsi istiqamətində misilsiz tarixi xidmətlərindən və böyük xilaskarlıq missiyasından danışıb. O bildirib ki, bu gün müasir, müstəqil Azərbaycan Ulu Öndər Heydər Əliyevin şah əsəri kimi dəyərləndirilir.

Sonra Ümummilli Lider Heydər Əliyevin həyat və fəaliyyətinə həsr olunan videoçarx nümayiş olunub.

Aqronomluq fakültəsinin I kurs tələbələri arasında Ulu Öndərin həyat və yaradıcılığına həsr olunan intellektual yarış keçirilib.

Sonda qalib komandanın üzvləri təşəkkürnamə və qiymətli hədiyyələrlə mükafatlandırılıb.