Azərbaycan Dövlət Aqrar Universitetində (ADAU) 8 Mart – Beynəlxalq Qadınlar Günü münasibətilə silsilə bayram tədbirləri keçirilib.

Universitetin Əsaslı kitabxanası və Energetika və elektrik mühəndisliyi kafedrasının birgə təşkilatçılığı ilə keçirilən tədbirdə ADAU-nun Tədris işləri üzrə prorektoru Əhməd Məlikov, Ümumi işlər üzrə prorektoru Ramin Əliyev, professor-müəllim heyəti, kitabxana əməkdaşları və tələbələr iştirak ediblər.

Tədbir Ulu Öndər Heydər Əliyevin və Azərbaycanın ərazi bütövlüyü uğrunda şəhid olmuş qəhrəmanların xatirəsinin bir dəqiqəlik sükutla anılması ilə başlayıb. Çıxış edənlər qadınları təbrik edərək onların cəmiyyətdəki əhəmiyyətli rolunu vurğulayıblar. Bayram tədbiri musiqi və rəqs nömrələri ilə davam edib, sonda xanımlara hədiyyələr təqdim olunub.

Tələbə Həmkarlar İttifaqı Komitəsi və Tələbə Gənclər Təşkilatının təşkilatçılığı ilə Baytarlıq təbabəti fakültəsində keçirilən tədbirdə qadınların cəmiyyətdəki rolu və onların fədakarlığı ilə bağlı çıxışlar edilib. Şəhid analarının da iştirak etdiyi tədbirdə şeirlər, mahnılar səsləndirilib, saz və gitara ifaları təqdim olunub. Fakültə əməkdaşlarına və tələbələrə gül və hədiyyələr təqdim edilib, payız imtahan sessiyasını uğurla başa vuran tələbələrə təşəkkürnamələr verilib.

Mühəndislik fakültəsində təşkil olunan tədbir universitetin Əsaslı Kitabxanası, Tələbə Həmkarlar İttifaqı Komitəsi və Tələbə Gənclər Təşkilatının dəstəyi ilə keçirilib. Fakültənin xanım müəllim və tələbələrinə gül hədiyyələri təqdim edilib, müxtəlif musiqi nömrələri səsləndirilib.